امير ترين ڀارتي اداڪارن جي لسٽ جاري ٿيڻ کانپوءِ امير ترين اداڪارائن جي لسٽ به سامهون اچي وئي. ڀارتي اداري ”هورون انڊيا“ جي اميرن جي لسٽ ۾ شاهه رخ خان سميت شوبز انڊسٽري جون ڪيتريون ئي شخصيتون شامل آهن پر امير ترين ڀارتي اداڪارا جو نالو سامهون اچڻ تي سڀئي حيران ٿي ويا آهن.هورون انڊيا رچ لسٽ 2024 موجب، ڀارت ۾ امير ماڻهن جو انگ وڌي ويو آهي ۽ 1,539 ماڻهن وٽ 1,000 ڪروڙن کان وڌيڪ جا اثاثا آهن، گذريل سال جي مقابلي ۾، هن سال وڌيڪ 220 ماڻهو ان لسٽ ۾ شامل ٿيا آهن. هورون انڊيا رچ لسٽ موجب ڪنگ خان 7300 ڪروڙ ڀارتي رپين جي اثاثن سان ڀارت جو امير ترين اداڪار آهي. جوهي چاولا شاهه رخ خان سان گڏ ڪيترين ئي فلمن ۾ ڪم ڪري چڪي آهي، هوءَ 4600 ڪروڙ ڀارتي رپين جي اثاثن جي مالڪ آهي ۽ ان کانسواءِ ٻي ڪا به ڀارتي اداڪاره 1000 ڪروڙ ڪلب ۾ شامل ناهي. 90ع جي ڏهاڪي ۾ پنهنجي فلمي ڪيريئر جي شروعات ڪندڙ جوهي چاولا ڪيترين ئي هٽ فلمن ۾ ڪم ڪيو، اداڪارا 1995ع ۾ ڀارتي صنعتڪار جئه مهتا سان شادي ڪئي، جنهن مان کيس ، هڪ پٽ ۽ هڪ ڌيءَ جو اولاد آهي. سال 2000ع ۾ جوهي چاولا فلم پروڊڪشن جي ميدان ۾ قدم رکيو، هوءَ شاهه رخ خان جي ڪمپني ”ريڊ چليز انٽرٽينمينٽ“ ۾ به ڀائيوار آهي، ان کانسواءِ هوءَ شاهه رخ سان گڏ آءِ پي ايل جي امير ترين ٽيم ڪولڪتا نائيٽ رائيڊرز جي شريڪ مالڪياڻي آهي.